إن مساحة البيت اللي عايش فيه تكون صغيرة أكيد بتكون ليها مميزات و عيوب ، و لكن دايما بتكون في حاجه واحدة أكيده بمجرد ما تتعلم ازاي تنظم و تظبط كل حاجه في المساحة الصغيرة دي هتلاقي نفسك بدأت ترتاح و تستمتع بالمكان اللي انت عايش فيه ايا كانت مساحته كام متر مربع
اختيار عفش مناسب لمكان مساحته صغيرة أكيد هتفرق كتير عن اختيار عفش لمكان مساحته أكبر. و انت بتختار عفش عشان مكان مساحته صغيرة لازم تكون عارف انك هتحتاجه يكون عملي و مفيد عشان تاخد اكبر فايدة من كل مساحة متاحة عندك في المكان اللي هتفرشة.
و دي شوية نصايح عقار ماب جمعها لك عشان تساعدك و انت بتشتري اي عفش خاص بمكان مساحته صغيرة و تستفيد من كل من كل ركن موجود عندك :
1- اختار القطع اللي ليها اكثر من استخدام واحد فقط:
عشان تقدر تتأقلم و تعيش بطريقة مريحة في مكان مساحته صغيرة يبقى دايما و انت بتشتري عفش لازم تشتري قطع متعددة الاستخدام وده بيبقى أكيد أحسن من مجرد انك تشتري عفش مساحته أو حجمه صغير بس مش متعدد الاسخدام و بالتالي ممكن تحتاج جنبة قطع تانية عشان تكمل احتياجات الغرفة.
ودي شوية أمثلة من انواع العفش اللي ممكن تستخدمه بكذا طريقة:
1- تربيزة جانبية متعددة الاستخدامات و متعددة أماكن التخزين.
2-كرسي بمكان للتخزين ، يمكن استخدامة كرسي أو مكان لتخزين لعب الاطفال أو اي حاجه على حسب احتياجات الغرفة اللي موجود فيها.
3-كنبة سرير: ودي بتكون مفيدة جدا ومفيش بيت مساحته صغيرة ينفع ميكونش فيه القطعة دي من الأثاث اللي بتحتاجه لو في ضيف هيقضي يوم عندك أو لو حابب تزود الأماكن بتاعت النوم عندك عشان تكفي افراد العائلة كلهم.
2-اشتري عفش يكون فيه أماكن كتير للتخزين بطريقة ذكية :
قطع الاثاث اللي بيكون فيها اماكن اضافية للتخزين دي بتعتبر أكثر قطع انت محتاجها في مكان مساحته مش كبيرة، لأن في الغالب لما بتعيش في بيت مساحته صغيرة بيتلخبط و بيتكركب بسرعة جدا و دا بيرجع لعدم وجود اماكن كافية لتخزين احتياجات كل غرفة زي مثلا غرفة الاطفال اللعب ممكن تبقى ملهاش مكان فبالتالي نبدا نحطها عالسرير او عالأرض فتعمل كركبة ملهاش لازمة انما لو استخدمنا مثلا الكرسي اللي جواه وحدة تخزين نقدر نقول ان دا هيكون المكان المناسب جدا ليها و نكون تفادينا اي كركبة ملهاش لازمة.
3-استخدم كل المساحات الموجودة :
الموضوع متعلق انه كل قطعة في البيت تكون مفيدة أحسن ما تبتدي تشتري و فجأة تلاقي كل حاجه محطوطة فوق بعض ومفيش مساحة ليك انك تتحرك في البيت فمثلا لو اشتريت قطعة اكسسوار بسيطة للغرفة واللي أكيد حجمها بيكون صغير بطريقة تناسب مساحتها - زي مثلا حامل الريموت بتاع التلفزيون و كوباية الشاي - أكيد هتحس بفرق و هتقدر تجمع الحاجات اللي محتاجها في مكان واحد من غير كركبة و كمان هتحس بمتعة و استمتاع اكثر بسبب سهولة استخدام القطع دي.
4- اشتري الترابيزات المتعددة الاستخدامات:
من أنواع الترابيزات المفيد جدا و كمان الممتعة عشان تخلي عندك احتمالات وأشكال كتيرة ممكن تعملهم بيها لو بتحب التغير و بتزهق بسرعة من شكل البيت.
ممكن تستخدم الترابيزات دي في غرفة المعيشة (living room) و تعمل بيها مثلا شكل ثلاثي ممتاز أو تستخدم الترابيزة لوحدها في الاماكن اللي محتاجها فيها زي الصورة دي
5-الستائر
ممكن تصرف ديكور و قطع أثاث متعددة التخزين وكل الحاجات المفيدة دي و تنسى حاجة بسيطة جدا و هي الستاير اللي بيها ممكن تدي احساس بالمساحة لو اخترت الوانها فاتحة مع إضاءة معينة زي الصورة دي الغرفة ممكن تبان مساحتها كبيرة لكن اختيار الألوان و الاضاءة و ألوان الستائر هم العوامل الرئيسية في الاحساس دا.
6- اهتم بالاضاءة:
الاهتمام بالاضاءة مهم جدا خصوصا في المساحات الصغيرة عشان نخلق احساس للمكان اوسع من الحقيقة. عشان تحس ان المساحات اكبر في أنواع مختلفة من الاضاءة ممكن تستعملها زي مثلا لما تيجي تحط اضاءة في غرفة مساحتها صغير خلي النور يكون بيتوجه للسقف بتاع الغرفة و استخدم كمان اضاءة لونها أبيض.
7-الفواصل:
ممكن كمان تستخدم الستاير عشان تكون فاصل بين مكانين عشان يبقى عندك بدل غرفة غرفتين ، أو ممكن تستخدمها في جانب في الشقة اللي محطوط فيها الغسالة مثلا .
الفواصل دي كمان سعات بتكون مفيدة لو انت مش عايز فواصل دايما و بتحتاجها في وقت معين و بتحتاج تكون مش موجودة على فترات قريبة عشان كده لو اخترت ستارة شكلها حلو و ماشية مع ديكور الشقة ممكن تكون لمسة ديكور جميلة بتضيف لجمال البيت.
و دي بعض الأمثلة لاستخدام الستائر فواصل:
8-استخدم المرايات كتيير
من اسهل الخدع اللي ممكن تستخدمها لو عايز مكان معين يظهر أوسع من الحقيقة انك تستخدم المرايات، و دا بسبب ان المرايات دايما بتعكسلك مساحات زيادة عن الحقيقة زي الصور دي المكان صغير بس باستخدام شوية مرايات المكان بيبان دايما اكبر من الحقيقة
ليست هناك تعليقات:
إرسال تعليق